الاثنين، 18 أغسطس 2008

مصر والتخلف


لا ينكر احد حينما يتجول فى شوارع القاهرة ان مصر تتمتع بما لا يتمتع به الاخرون
فلا يحدث فى اى بلد ان تجد حصانا واقعا فوق سيارة مثلا
او اربع صفوف من السيارات فى شارع من حارتين وفى كلا الاتجاهات
او شارع بالكامل متوقف عشان فى سواق اوتوبيس بيشرب سيجارة وسايب الاوتوبيس فى وسط الشارع
وعادى جدا ان لو حد اعترض ان السواق المتخلف ده يزعق ويزمجر ويعترض على اعتراض الناس
"ايه ..مشربش السيجارة يعنى؟!"
وعادى جدا جدا ان الناس اصلا متعترضش..وتفضل واقفة متنحة
عادى جدا انك تمشى فى الشارع تلاقى امين شرطة بيوقفك بكل جدية وانت سايق عربيتك ومعاه دفتر المخالفات ويقولك وصلنى اخر الشارع
وعادى برضه انك تركبه ومتعترضش
عادى انك تلاقى يافطتين عكس بعض فى الشارع والاتنين بجانب بعض تماما ولو خالفت واحده منهم هتاخد مخالفة
عادى جدا انك تلاقى واحد فى شارع عمومى حاطت براميل على مساحه تكفى لانتظار 6 عربيات عشان لو جالو ضيوف يلاقو مكان يركنو
وعادى ان يقولك ممنوع الركنه هنا يا باشا
وعادى برضو انك تقوله انا اسف
يا ترى احنا ليه كده؟!
حاجة فى الجينات مثلا؟!!
المصريين كده اصلا؟
لا مبالاه وغباء وسلبية وعنطظة؟!!
طبعا لا
امال ايه الموضوع؟
الموضوع وما فيه ان الشعوب فى الاخر بتكسب ثقافتها من فئة هى اقل من 10 فى المئة من مجمل الشعب
والفئة دى هى الفئة المسيطرة اللى بتفرض على الشعب ثقافته
وده طبيعى لان قلي جدا من الناس من لديهم مهارات القياده
والاخرون تابعون
فاذا نظرنا لمن قام بقيادة مصر فى القرن الماضى

فسنعلم من ورثهم التخلف والغباء واللامبالاه وعقدة النقص
وليس معنى هذا ان من قام بقياده مصر هو متخلف وغبى غير مبالى
انما هو لم يكون حريص على بناء شخصية المواطن المصرى مثل حرصه على الحفاظ على استقرار نظام الحكم
فنظرا للديموقراطية السائدة فى مصر منذ عشرات السنين!!
بات الحكام يرقدون على اعناق شعوب لم ولن تختارهم
وباتوا ينامون على كابوس ان يفيق هذا الشعب وينزع منهم مكانتهم العالية
وشعب مثقف متعلم ايجابى يعلم حقوقه وواجباته هو اخر شىء يحتاجه هذا النموذج من السيطرة
لذا كان الشعب ضحية انظمة علمته كيف يكون سلبيا
كيف يفقد الامل
كيف يسعى للقمة العيش
فقط لاغير

مصر يا ناس






هناك 3 تعليقات:

Eng.Ebtehal يقول...
أزال المؤلف هذا التعليق.
Eng.Ebtehal يقول...

أعتقد ان ده راجع لأن الناس حبت عيشة السلبية
حد يفكر و أنا أنفذ و أنا هتعب قلبي و دماغي و أفكر ليه
كمان الأخلاق بدأت تنحدر و الناس تسكت و محدش يعترض و لو فكرت تعترض يا خبر انت مش عايز الناس تعيش و لا ايه!
و يحسسوك ان انت اللي غلط مع انهم ممكن من جواهم رافضين اللي بيحصل ..

كلمتين لو الشعب المصري بطلهم هيكون شعب غير .. معلش و عادي
كلمتين لا لهم معني و لا داعي غير تمويع الأمور

كمان غير ثقافة "هو يعني أنا اللي لازم أتكلم و لا هو انا اللي هغير الكون "
مع ان لو كل واحد بدأ بنفسه فعلا الكون هيتغير

جزاك الله خيرا

saharelhoseny يقول...

عندك حق فعلا فى الكلام اللى بتقوله
ووضع الناس حاليا راجع اساسا للبعد عن الله وعن الدين واتباع الرسول
قليل قوى دلوقتى اما تلاقى حد بيقرا اى كتاب يعرفه ربنا اكتر ويقربه منه او يفهم دينه اكتر
لكن بردو مينفعش احنا نيأس ولا نتأثر بالناس ده
لان لو مفيش حد يقدر يقود حاليا
فسنكون نحن القاده باذن الله
من الان فصاعدا
واظن ان ده عهد اخدناه على نفسنا ولازم نكون على قدر المسؤليه
وجزاك الله خيراعلى هذا الموضوع